आह्म्मीं उत्थै जाना तुम्मीं उत्थै जाना उ’ऐ सांझी थां
मड़ा मूंह् मोड़ना ते मोड़, जफ्फा आह्म्मीं कैसी पां,
छिन्ना पाई गलाया में निं तेरा तूं निं मेरा
लुट्टी-पुट्टी गेआ, त्रुट्टी सांझ एह् हिरखें दा फेरा।
हिरखी-समोधी माह्नू हा जेह्ड़ा किस बक्खी आनी मुड़ेआ
लुच्च-लालचैं फसियै बल्लें-बल्लें आपूं चें आनी लड़ेआ
बालियै दियूटी छुत्त गल्ल पाई लेआ धरप्फड़े दा घेरा
लुट्टी-पुट्टी गेआ, त्रुट्टी सांझ एह् हिरखें दा फेरा।
केह् करना जित्थै अक्खीं सत्ती होंदे नित्त नमें पाप
परमेसर कोला बड्डे बनदे कुसै गी निं बौढ़दा ताप
जड्ड-जज्जरा अपनाइयै किस गल्ला छोड़ी दित्ता रूप जठेरा
लुट्टी-पुट्टी गेआ, त्रुट्टी सांझ एह् हिरखें दा फेरा।
रिश्ते-नाते दोस्ती-यारी भुल्लियै फड़ी लेआ कम्म केह्ड़ा
इक दुए गी जोआड़ियै नच्ची-नच्ची कोड़ी सु’ट्टन बेह्ड़ा
होरनें दी छोड़ो, इत्थै घर-घर पनपी गेदा झेरा
लुट्टी-पुट्टी गेआ, त्रुट्टी सांझ एह् हिरखें दा फेरा।
खीह्सै-खीह्सै बेन्यायी भरोची ब कु’त्थुं लग्गै सगाती गेड़ा
डरदा-डरांदा, ढंडै अपना कस्सरी सोचां पाली होई नेड़ा
बरानी, सोका, ऐह्न बटाला कि’यां उज्जन देग फुंगें टेरा
लुट्टी-पुट्टी गेआ, त्रुट्टी सांझ एह् हिरखें दा फेरा।
रक्खेआ ते कन्नै न्यांऽ-तंत्र दी पवै देकर लोड़
हांभै कश होंदे निग्गोसारी कन्नै लभदे डींह्गे-त्रेह्डे मोड़
कि’यां त्रुट्टग-भज्जग बनाए दा हत्थें तेरे पक्का ठेरा
लुट्टी-पुट्टी गेआ, त्रुट्टी सांझ एह् हिरखें दा फेरा।
भुक्खे-नंगें गी फंड-द्रंड पर आपूं खर्चे खु’ल्ले
तरकोई तरकोइयै मनुक्खी हिरख सरूप पेई गेआ पैरें पुल्ले
दिक्खो लोको, कैसा झुल्ला एह् अंधी-झक्खड़ें दा न्हेरा
लुट्टी-पुट्टी गेआ, त्रुट्टी सांझ एह् हिरखें दा फेरा।
हर कोई छड़कै-फड़कै जि’यां छाह् छुलदे छलकोंदा मक्खन
डोलके खंदी इस धरती दा सोआद सारे गै चक्खन
बज्जो-बज्जी कोई बिरला माह्नू तुप्पै हिरखी रागिनी बसेरा
लुट्टी-पुट्टी गेआ, त्रुट्टी सांझ एह् हिरखें दा फेरा।
जिंद मेरी भरोची दुक्ख-कसालें, मत किश मिगी आख
सनाई सकना तां सनाs कोई हिरखै दी लम्मी भाख
डौर-भौर होइयै स्वासें बज्झा चैंचल चित्त मन मेरा
लुट्टी-पुट्टी गेआ, त्रुट्टी सांझ एह् हिरखें दा फेरा।
————————
