जिस घरै च मिलदा स्हारा ऐ
मां, सच्चा तेरा दुआरा ऐ ।
नेईं रौंह्दा कोई नरास तेरै
होंदी ऐ पूरी आस तेरै
मी लभदा निं कोई दाता ऐ
तेरे नेहा इत्थै माता ऐ
सब तेरे दुआरै ढट्ठै दे
भरने गी झोलियां नट्ठै दे
सदा होंदा पार-तुआरा ऐ
जिस घरै च मिलदा स्हारा ऐ ।
एह् भगत सकामी सारे, मां
जो बोल्ला दे जैकारे, मां
लखपति करोड़ जां अरबपति
चांह्दा ऐ भिक्खेआ मती मती
इत्थै औंदा हर सुआली ऐ
हत्थ फड़ियै ठूठा खाल्ली ऐ
नेईं लभदा होर दुआरा ऐ
जिस घरै च मिलदा स्हारा ऐ ।
एह् जग सारा भिक्ख-मंगा ऐ
नेईं रज्जै भुक्खा-नंगा ऐ
लेई इक्कै हीखी लंघै दा
नत्त मस्तक होई मंगै दा
दिक्खै जदूं हालत माड़ी मां
दिंदी ऐ छप्पर फाड़ी मां
जिस रचे दा एह् संसारा ऐ
जिस घरै च मिलदा स्हारा ऐ ।
नेईं दिंदी झूठा लारा मां
करदी सब दा निपटारा मां
जग थक्कै मंगी-मंगी नेईं
मां अक्कै बंडी-बंडी नेईं
कोई मंगै दा हत्थ कड्ढियै
कोई आवै झोली अड्डियै
निं मंगने गी कोई थाह्रा ऐ
जिस घरै च मिलदा स्हारा ऐ ।
मंगो तुस बेशक झक्को नेईं
सुक्खन दी शर्त रक्खो नेईं
जो कण-कण बिच मां बसदी ऐ
सुनी सुक्खन तुं'दी हसदी ऐ
जिस आपूं मंगी खानी ऐ
उन्न सुक्खन केह् चढ़ानी ऐ
एह् जगत गै ओह्दा सारा ऐ
जिस घरै च मिलदा स्हारा ऐ ।
