कीता ऐ सुहागनें शंगार, दिन आया करेआचौथी दा
चेह्रे पर आया ऐ नखार, दिन आया करेआचौथी दा।
बाद्धू खाई फेनियां ढिड्ड पीड़ लाएओ नेईं
गैसा आह्ली टिक्कियें, खाद्धी दी पचाएओ नेईं
भुस्सी पेई जानी ओ नोहार, दिन आया करेआचौथी दा
कीता ऐ सुहागनें शंगार, दिन आया करेआचौथी दा।
कौड़ा घुट्ट लाने आह्ले, घुट्ट अज्ज लाएओ नेईं
भुल्लियै बी कदें तुस लाड़ी गी सताएओ नेईं
बेल्ले सिर आई जाएओ घर, दिन आया करेआचौथी दा
कीता ऐ सुहागनें शंगार, दिन आया करेआचौथी दा ।
मैली अक्खीं कन्नै कुसै होर गी निं दिक्खना
मर्यादा बिच्च रौह्ना, त्यहारे थमां सिक्खना
तुप्पना निं दूआ कोई थाह्र, दिन आया कराचॊथी दा
कीता ऐ सुहागनें शंगार, दिन आया करेआचौथी दा ।
सस्स र'वै मां बनी, नूंह् र'वै बनी धीS
घरै-घरै बिच्च फेर पौन बखेड़े की?
करी लैना सोच ते बचार, दिन आया करेआचौथी दा
कीता ऐ सुहागनें शंगार, दिन आया करेआचौथी दा ।
एकता ते भाईचारा साढ़ी पन्छान ऐ
त्यहार साढ़े देसा दी जिंद कन्नै जान ऐ
फलै-फुल्लै हिरख-प्यार,दिन आया करेआचौथी दा
कीता ऐ सुहागनें शंगार, दिन आया करेआचौथी दा ।
पच्छमीं सभ्यता गेदे आं रंगोई अस
बोल्लै जे कोई डोगरी, दिक्खने ध्रोई अस
भुल्ले 'किप्पी' अपने त्यहार,दिन आया करेआचौथी दा
कीता ऐ सुहागनें शंगार, दिन आया करेआचौथी दा
चेह्रे पर आया ऐ नखार, दिन आया करेआचौथी दा।
