जाल ते पिंजरा

जाल च फसी दियां मच्छियां
ते पिंजरे च बंद पक्खरुऐ
दा तड़फना ते छड़कना
जग-जाहर ऐ
पर क्या कदें कुसै ने
जाल ते पिंजरे पर जो बीतदी ऐ
ओह् बी बुज्झी ?

जाल गै जानदा ऐ तड़फदी जानें गी
अपने कलावे च सांभना किन्ना मुश्कल होंदा ऐ
तड़फदे जाल बी न
ते
पिंजरा गै जानदा ऐ
जे छड़कदे पक्खरुएं दे फड़फड़ांदे फंघें
दे झक्खड़ें अग्गें खड़ोना केह् होंदा ऐ
छड़कदे पिंजरे बी न

जाल ते पिंजरे दी पीड़ कोई बुझदा बी कि’यां
ओह् बेजान-बेज़ुबान कदें कूए-बोल्ले गै नेईं ।