मेरी तलाश दा उमरी ने भेत खु’लदा रेहा
गुआचेआ में ,तां किरदार मिलदा-जुलदा रेहा ।
कोई बी पाप मते चिर कदें बी नेईं फलेआ
युगें-युगें दा गै ,बेशक ऐ, न्हेर झुलदा रेहा ।
में भरेआ ज़िंदगी दा कुंड तोपा-तोपा करी
में तोपा-तोपा गै दिन-रात रोज डु’लदा रेहा ।
मते हे नेर बा हिम्मत मेरी बी घट्ट निंही
हा बाह्रा बंद, बो अंदर दा अपने खु’लदा रेहा ।
भविक्खै गी हा में बेहतर बनाने गी लग्गा
में अपने अज्ज नै हर बेल्लै नित्त घुलदा रेहा ।
पता गै चलेआ निं कुसलै ही स’ञ घिरी आई
में खिड़ियै ज़िंदगी दी धुप्पें इच बो फुलदा रेहा ।
मते गै पुख़्ता हे मेरे ख़्याल मेरे शा
में रोज जुड़दा हा ,बेशक में रोज ठु’लदा रेहा ।
दड़ी दी कु’त्थें निं ही मैल, में फ्ही केह् करदा
में गोलदा गै रेहा नित्त, तां गै गुलदा रेहा
