में मैट्रो शैह्रा दी सुख-सुवधा गी सरांह्दा रेहा
रात-बरातीं, बेल-कबेल्लै, ग्रांऽ बी चेतै औंदा रेहा
मार डुआरी उच्ची जेही, कूंज डारें शा खिंडी गेई
कदें-कदें ओह् गास मोकला, बाग बी चेतै औंदा रेहा।
में बी बड्डा आदमी बनना गै चांह्दा हा
लोड़ें, थोड़ें दा जीन, कदूं रास गै औंदा हा
मेरे ग्रांऽ गी हर लौह्की-बड्डी चीजै दी लोड़ ही
रोज़गार, पढ़ाई, नौकरियें दी, उत्थै मती थोड़ ही
में बी देना चांह्दा हा, ञ्यानें गी सौखी जिंदगी
नमीं पढ़ाइयें, नमें एक्सपोजर, नमें समें दी लोड़ ही
केह्ड़े-केह्ड़े सुखने में, भविक्खै दे सजांदा रेहा
रात-बरातीं, बेल-कबेल्लै, ग्रांऽ बी चेतै औंदा रेहा।
कार्पोरेटें दी प्रोफेशनल दुनिया, मिगी बड़ा तरसांदी ही
फर्राटेदार, गिटपिट अंग्रेजी, मनै दी तांह्ग बधांदी ही
उड्डरे दे हे पराह्ने मेरे, पैर निं भुञां पौंदा हा
मैट्रो दी लिशक-मिशक दा, मिगी चानना रोंह्दा हा
गड्डी लैगे, फ्लैट लैगे, फ्ही टौह्रै नै रौह्गे अस
जेल्लै सौखे होई जाह्गे, फ्ही जोरै नै रौह्गे अस
केह्ड़े-केह्ड़े लारें नै, अपने आपा गी पतेआंदा रेहा
रात-बरातीं, बेल-कबेल्लै, ग्रांऽ बी चेतै औंदा रेहा ।
बड़ा गै चाएं-चाएं दोस्ता, ग्रांऽ में छड्डी आया हा
हिरख, समोध, ग’ली-म्हल्ला, पिच्छें गै छड्डी आया हा
सिक्खी ले मुंडी बड्ढने दे सोफिस्टिकेटड जेहे तरीके
मल्लो-मल्ली, मेरो-मेरी, इ’यै बड्डे शैह्रा दे सलीके
सुख-दुख, तकलीफ निं इत्थै, कोई सांझी करदा
कुसै गी कुसै नै वाह् नेईं, कोई जींदा जां मरदा
अपने दिलै दे ज़ख्में गी सभनें शा छपांदा रेहा
रात-बरातीं, बेल-कबेल्लै, ग्रांऽ बी चेतै औंदा रेहा ।
सोशल स्टेटस दी खातर, नेह् इत्थै बी लाया हा
सच्चा-सुच्चा हिरख भलाइयै, झूठा बंधन पाया हा
उद्धर मेरे मैह्रमा दा बी विश्वास डगमगाया हा
खिंझें-धोखें दे पाई कलीरे, उ'न्न बी घर बसाया हा
मेरे पचोआड़ै दे बूह्टे, बलगी-बलगी कम्लाई गे
रीसो-रीस बालकनी च, एक्ज़ोटिक बूह्टे आई गे
में विश्वासें गी तोड़ी, अपनी गै तोड़ चढ़ांदा रेहा
रात-बरातीं, बेल-कबेल्लै, ग्रांऽ बी चेतै औंदा रेहा।
चाचा, ताया, दादी, नानी, सब टैम-बेटैमें तुरी गे
कदें क्लोजिंग, क्रिटिकल मीटिंग, अस इत्थै गै फसी रेह्
गमीं-खुशी च घर पुज्जना, औखा गै बझोंदा रेहा
बल्लें-बल्लें मित्तरोचारी, साक-सरबंध छड़कोंदा रेहा
में बी बड्डे शैह्रा दे रंगें दे बिच्च रंगोई गेआ
सिद्धा-सादा जागत हा, आखदे माडर्न होई गेआ
अपने मत्त-संस्कार भलाइयै, केह्ड़ियां में नभांदा रेहा
रात-बरातीं, बेल-कबेल्लै, ग्रांऽ बी चेतै औंदा रेहा ।
हुन इस झूठे जीने शा में बड़ा गै हुट्टी गेआ
उप्परा आं नमां नरोआ, अंदरा बड़ा गै त्रुट्टी गेआ
चाह्न्नां रात्तीं मंझी डाहियै, फ्ही गिनां में तारें गी
दिनें दिक्खां बसंतर बगदा, ते नंदनी दे प्हाड़ें गी
हुन परदेसन जिंद एह् मेरी घर परतोना चांह्दी ऐ
बिछड़ी दी एह् कूंज बजोगन, डारें नै रलना चांह्दी ऐ
जिंद मुहाइयै की छड़े में पैहे गै कमांदा रेहा
रात-बरातीं, बेल-कबेल्लै, ग्रांऽ बी चेतै औंदा रेहा ।
