हक्कदार

मैह्‌ले दे मालका,
खैरात देना तेरा अधिकार ऐ
देऐं, भामें नेईं
पर, मेरा ते सीस लैने दा बी हक्क नेईं

मेरे दरोआजे पर खड़ोते दे माह्‌नुआ,
तूं संगमरमर दी कंधें गी दिक्खा करनां
पर अंदरला दक्ख नेईं,
तेरे लीरो- लीर चोले दी हर टाकी बी
कुसै मजार दी सुच्ची चादर ऐ
ते मेरा मखमली लाब्बा बी जिंदा लाश दे कफ़न आंह्‌गर ऐ

हुन, दस्स हां मिगी
जे फकीर कु'न ऐ
तूं जां में?
तेरे हत्थें च कासा ते है
ते मेरे हत्थें गी ते कासे दा बी हक्क नेईं।.