खड़ोते दे जो निम्मोझाने न खंडर
खज्जल कुसै दे एह् खान्ने न खंडर ।
कदें जीह्बा सारें दी चरचा ही जिंऱदी
उ'ऐ सब दी नज़री बगान्ने न खंडर ।
बा-रौनक कदें से बे-रौनक एह् थाह्रे
मुहाफ़िज़ एह् यादें दे खान्ने न खंडर ।
बड़ी गैह्मा-गैह्मी ही चौरै ऱलै जित्थै
अज्ज भड़की दी रूहें ठकने न खंडर
एह् बीते ते गुज़रे ज़माने दी क्हानी
एह् गुमनाम किस्से फसान्ने न खंडर ।
मिटी सभ्यता दी नशानी ऐ खीरी
एह् भेतें दे लुटदे खज़ान्ने न खंडर ।
एह् बिरसे,धरोहर ते इतिहास साढ़े
भमें बेनुहारे, विरान्ने न खंडर ।
तेहासै दे स्हिलदे, मस्होंदे एह् पन्ने
अजूबे एह् सदियें पुराने न खंडर ।
मनै बिच्च बेदन मनै दी छपैली
परेशान गुमसुम ते र्हान्ने न खंडर ।
एह् उजड़े दे मेल एह् नाज़ेब मंज़र
एह् चेते मुजस्सम पुराने न खंडर ।
कदें साढ़ पुच्छै कोई साढ़ी बी आइयै
मारै दे आले नमाने न खंडर ।
ऐह्में करै दे निहालप कुसै दी
एह् लग्गे दे हीखी धङानै न खंडर ।
लाचार बे-बस एह् ख़स्ता जेह् ख़ाके
इक्क दिन एह् 'पूरण' भुरी जाने खंडर ।
