मेद,
नि’म्मी-नि’म्मी
मन-चित भांदी
निरछल
होठें पर मुस्कानें
आह्ली भोली कंजक
बन्न सबन्ने
खेडनुऐं नै
भांत-सभांते जतनें कन्नै
नित्त जिसगी पतेआना पौंदा !
मेद,
सूरज दे चढ़ने शा पैह्लें
सूरज दे ढलने दे मगरा
तुलसी दे थढ़ै, शिवालै
पिप्पलै हेठ
कुसै भाग्याली दे हत्थें दा दीप-दान
जां
सुच्चम ते निजमें अंदर लट-लट जगी
नरातें दी अखंड जोत !
मेद,
औखे वक्तै दी सिज्ज्ली चुप्प जन कोई प्रार्थना
जां
बेआसरे दा समर्पण !
मेद,
कठन समें च इक मित्रवत साथ!
मेद,
रुक्ख-बूह्टें च जीवन
फुल्लें-फलें च रस भरने आह्ली
कोई मिट्ठी नेही सूरजै दी रिश्म !
मेद,
कोरजमां पानी
कबीर, सूरदास, तुलसी
रैदास, मीरा दी वाणी !
