जरम होऐ जे धीएं दा तां नक्क चाढ़दे की
दमैं इक बराबर, अड़ेओ, पुत्तर होऐ जां धीऽ ।
पुत्तर जमदे सारे खुशी नै फिरदे लोक सनांदे
धीऽ होऐ तां इ’यां लभदे, अश्कै चिरै दे मांदे
बत्त परानी नेईं छोड़गे, कु’न्न बदलनी लीह्
दमैं इक बराबर, अड़ेओ, पुत्तर होऐ जां धीऽ ।
पुत्तर जमदे ढोल-ढमक्कैं पौन भांगड़े रज्जी
धीऐं बेल्लै छड़ी तिउढ़ी, कैसी एह् निर्लज्जी
सुंगड़ी गेदी सोच ऐ कैह्सी, समझ निं औंदी मी
दमैं इक बराबर, अड़ेओ, पुत्तर होऐ जां धीऽ ।
आस कुसै दी अज्जै धोड़ी होई सदा निं पूरी
पुत्तर होङन, सेवा करङन, नियों सदा जरूरी
हर इक पुत्तर सरबन नेइयों, कौड़ा घुट्ट एह् पी
दमैं इक बराबर, अड़ेओ, पुत्तर होऐ जां धीऽ ।
धीएं दे बी होंदे अक्सर मते हारे अरमान
किस्मत आह्ले घरैं खलारै धीऽ अपनी मुस्कान
ओह्दे पर बी गौह् करो हां, उ’ब्बी घरै दा जीऽ
दमैं इक बराबर, अड़ेओ, पुत्तर होऐ जां धीऽ ।
मन धीऊ दै होंदी अक्सर हिरख, प्यार, हमदर्दी
दिखदी-सुनदी सारा किश ते चुप-चपीती जरदी
उट्ठो, बदलो रीतां-पिरतां, करेओ सोच वसीह्
दमैं इक बराबर, अड़ेओ, पुत्तर होऐ जां धीऽ ।
जिंदगी अंदर बक्खो-बक्ख ऐ धीऽ किरदार नभांदी
सीसां दिंदी मां ऐ जेकर, त्रीमत घ्रिस्त बनांदी
धीऽ गै भैन ते मासी-चाची, बूआ जां भतरीऽ
दमैं इक बराबर, अड़ेओ, पुत्तर होऐ जां धीऽ ।
गल्ल निं मन्नी जेकर, लोको, मगरा पच्छोतागे
गल्ल मनै दी कुसी जाइयै, सोचो फ्हिरी सनागे
पच्छोतावा करियै ‘केसर’, तुस केह् करगे फ्ही
दमैं इक बराबर, अड़ेओ, पुत्तर होऐ जां धीऽ ।
