जाई उसने कुतै होर खड़ोना
खीरी साह् जदूं उसदा होना
बौद्धिकता दी खीरी पौड़ी
धन-दौलत बी जानी छोड़ी
र्हान जगत गी करने आह्ले
दि’ब्ब- चमत्कारी गुण सारे
रेही जानी संपत्ति सारी
दूआ होना उत्तराधिकारी
कैसी ऐ एह् माया ठगनी
मोह्र कुसै फ्ही होर दी लग्गनी
किश जाना नेईं, पिच्छै रौह्ना
खीरी साह् जदूं उसदा होना ।
अनथक मेह्नत पलै च नस्सनी
डंडकार आई दिलै च बस्सनी
अग्गै जानी नेईं इक कौड़ी
पिछली पिछलें जानी रोह्ड़ी
अदूं असलीयत जानी खु'ल्ली
पेई जानी जदूं माया चु'ल्ली
पलें- खिनें बिच सब किश उड्डना
मौती ने जदूं आई पुज्जना
खुंज्झेआ मौका फ्ही निं थ्होना
खीरी साह् जदूं उसदा होना ।
दुनियावी प्रपंच रचाइयै
कल्पत स्रिश्टी उन्न बनाइयै
माया दा संसार खडेरी
करियै म्हेशा मेरी- मेरी
सोच, होश निं कीती बिंद
कड्ढी म्हेशा अपनी जिंद
मौती शा बी दुख मता होना
जदूं बिछड़ना उसगी पौना
इक इक चित्तर अग्गै औना
खीरी साह् जदूं उसदा होना ।
उसदे दुखें गी नित्त बधान
एह् सब चीजां नाशवान
देऐ साथ निं अपना सक्का
जिसगी माह्नू मारै जफ्फा
उ'ऐ रौह्नी ते उ'ऐ उग्गनी
त्याग भावना म्हेशा भुग्गनी
लोकार्पत जैदाद ने बचना
जां साहित्यिक कोई रचना
होर निं इत्थै किश बी रौह्ना
खीरी साह् जदूं उसदा होना ।
एह् सब चीजां देन निं साथ
जि'नें ई बनाया लाई दिन-रात
सोचै, मेह्नत कीती न्हक्क
धङानै रेहा जतांदा हक्क
आई सोच हुन खीरी बेल्लै
हत्थ रेहा निं किश बी जेल्लै
खीर तड़फेआ ते करलाया
बेल्ला उसगी हत्थ निं आया
उसलै फ्ही इ'यै किश होना
खीरी साह् जदूं उसदा होना ।
दुएं लेई जो होआ समर्पत
तन-मन-धन करी अपना अर्पत
हर थांऽ होनी ऐ उसदी शान
रौह्नी फ्ही पिच्छै बी पन्छान
नांऽ सनैह्री अक्खरें फब्बना
ते सर्व-व्यापक उसने लब्भना
इत्थै सज्जनो कुसै निं रुकना
काल दे अग्गै सारें झुकना
मुहां तदूं नेईं किश बलोना
खीरी साह् जदूं उसदा होना ।.
