गलांदे, अज्ज करियै जिंदगी ओह् दान आया
नमें ताबूत लेई जो कल्ल हा तरखान आया ।
मुहाई जिंद अपने आह्लड़ै गै बाह्ज दानै
परिंदा पिंजरे चा हा छुडाई जान आया ।
तरंगा सींदे-सींदे चुब्भ लग्गी गेई उसगी
जां खबरै दर्जियै दे हत्थ केह् परमाण आया !
शरीकें शा द'ऊं गैईं बद्ध ते औलाद निकली
जदूं खट्टा पेआ, करियै अदूं पन्छान आया ।
छुड़ाई गैरें शा फ्ही कीतियां अपनें गै लीरां
जिमीं दा फायदा हा जां करी नुक्सान आया ।
ओह् केह्ड़े तमगे दा हक़दार ऐ, उसगी सनाओ
जो अंधला लोथड़ू अपना छुड़ी शमशान आया ।
ओह् मेरे गुजरे दे समेंआ तुगी भुल्लां कि'यां दस्स
तूं जद् दर ठ्होरेआ, में सोचेआ भगवान आया ।
पता निं साथियो जे केह् लखोई गेआ ऐ अज्ज
मेरी गज़ला च कोई घाल जन अरकान आया ।
