सां-सां करदी बड़ी डरौनी लंघी गेई ऐ रात
नमें दिनै दी आ हां करचै कोई नमीं शुरुआत।
फ्हिरी परानी भुल्ल करियै नेईं बनायां खट्टी
लेई गाचनी पोची लै तूं नमें सिरे दा पट्टी
नमें पूरनें उप्पर लिख हां लेइयै कलम-दोआत
नमें दिनै दी आ हां करचै कोई नमीं शुरुआत।
सैल्ले बाग गै दस्सी-दस्सी बुद्धी छुड़नी फेरी
तेरे कोला गलत कराना लोकें सदा पश्हेरी
तूं सदा गै काबू रक्खेआं बिंद अपने जज़्वात
नमें दिनै दी आ हां करचै कोई नमीं शुरुआत।
प्रीत पराह्ली पाइयै अक्सर खान हेजले खार
पल-पल दिक्खी परखै करदे लोक तेरा किरदार
ताड़ लाइयै मते न बैठे, देन तुई सब मात
नमें दिनै दी आ हां करचै कोई नमीं शुरुआत।
केह्ड़ा पक्ख ऐ न्हेरा बिंद क, केह्ड़ा पक्ख ऐ चानन
तेरे मनै दा भेत ओह् लैना चंगी चाल्ली जानन
लोक लोआंदे जोतश जाइयै, कुधरै यरो जराह्त
नमें दिनै दी आ हां करचै कोई नमीं शुरुआत।
निक्की हारी गल्ल कुसै दी डाह्डी लोक छुआलन
अपनियां करतूतां सारे पड़दे पाई छपालन
आपूं कोई निं दिखदा ‘केसर’ अपनी कदें औकात
नमें दिनै दी आ हां करचै कोई नमीं शुरुआत।
