मंदरे दे शैह्र एह् होई प्रधान ऐ
ग’ली-ग’ली म्हल्लै-म्हल्लै खु’ल्ली गेई दुकान ऐ
लाइना बिच्च लग्गे दा बुड्ढा ते जोआन ऐ
डोगरें गी मिली गेआ मान ते सम्मान ऐ ।
रक्खा दी ख्याल साढ़ा, करा दी कल्यान ऐ
चुनियै जो भेजे, उं’दी बंद की जबान ऐ
बगा दी गंगा, बस करना स्नान ऐ
डोगरें गी मिली गेआ मान ते सम्मान ऐ ।
मैह्रमें दी होई गेई साढ़े पर मेह्र ऐ
मंदरें दे शैह्रै बिच्च पेई गेआ न्हेर ऐ
इं’दे हत्थ डोर साढ़ी, तीर ते कमान ऐ
डोगरें गी मिली गेआ मान ते सम्मान ऐ ।
चरस, फ्हीम, चिट्टे दियां खोह्ल्ली लैओ हट्टियां
करी लैओ कमाइयां ते करी लैओ खट्टियां
घर-घर मिली जाऽ जीने दा समान ऐ
डोगरें गी मिली गेआ मान ते सम्मान ऐ ।
औने आह्ली नसलें गी इ’यां गै मकाना ऐ
लत लाई नशे दी ते ऐबें बिच्च पाना ऐ
दुद्धा ते देहियां दी नेईं लभदी दुकान ऐ
डोगरें गी मिली गेआ मान ते सम्मान ऐ ।
धन्न भैनें-मामें गी जो उट्ठी न खलोतियां
फंडो इं’दे कुर्ते ते फंडो इं’दियां धोतियां
बाह्रा चिट्टे बगले ते अंदर शैतान ऐ
डोगरें गी मिली गेआ मान ते सम्मान ऐ ।
कोह्दे अग्गें जाई असें रोनियां न रोनियां
समाजा दी बुराइयां भाई इ’नें गै न धोनियां
डोगरें गी मटाने दा, लगदा इं’दा प्लान ऐ
डोगरें गी मिली गेआ मान ते सम्मान ऐ ।
देवियें ते देवतें दा वास ते स्थान ऐ
राजा जम्बूलोचन बी होआ परेशान ऐ
जम्मू बनी गेआ शराबा दा मचान ऐ
डोगरें गी मिली गेआ मान ते सम्मान ऐ ।.
