देस हा साढ़ा बनी रियासत, हुन यूटी-यूटी गा करदे
लोक तरक़्क़ी करदे आए, अस झिगड़े ढ़लते जा करदे
हंसें दे अस कांऽ बनी गे, अस कैह्दे ढोल बजा करदे
देस हा साढ़ा बनी रियासत, एह् हुन यूटी-यूटी गा करदे।
राज पाठ ते देश हा साढ़ा, साढ़ी गै सरदारी ही
भारत कन्नै हत्थ मिलाइयै कीती बफादारी ही
बंजर पुट्टी बरयाल बनाई, एह् उ’यै खेतर बाऽ करदे
देस हा साढ़ा बनी रियासत, हुन यूटी-यूटी गा करदे।
गुलाब सिंह नै इस देश गी डुग्गर देस बनाया हा
जोर हा बांहें जोरावर दी, जि’न्ने उं’दा साथ नभाया हा
अज्ज मेटियै लीकां ओह्की, अपने कसीदे गा करदे
देस हा साढ़ा बनी रियासत, हुन यूटी-यूटी गा करदे।
दरेआएं दे मूंह् मोड़ी दिंदे, ओह् योद्धा वीर खुआंदे न
प्हाड़ें दे सीने चीरी दिंदे, योगी गाथा उं’दियां गांदे न
घरें साढ़े इच्च बंडां पाइयै, तुस केह्ड़ा पुन्न कमा करदे
देस हा साढ़ा बनी रियासत, हुन यूटी-यूटी गा करदे।
खान-पान ते लावा साढ़ा, पेही जाना हुन चुल्ली ऐ
डुग्गर दे इतिहास गी सारें जाना भुल्ली ऐ
बनी मलाह् एह् बेड़ी साढ़ी, जानी बट्टे पा करदे
देस हा साढ़ा बनी रियासत हुन यूटी-यूटी गा करदे।
सिर देइयै सर कीते हे, सरूयें दे बूह्टे लाए हे
श्हीद होए हे मांमें दे पुत्तर, ब’न्ने चाइना जाई मलाए हे
अज्ज उं’दी मांमें दी झोली अस केह्ड़े फुल्ल आं पा करदे
देस हा साढ़ा बनी रियासत हुन यूटी-यूटी गा करदे।
———————————————
