नां बौंह्दे नां सौंदे
नां गै जंदे कुसै बी थाह्र
माह्न दी सेवा बिच हाजर
एह् बूह्टे लगातार
साह् रुकी जा नेईं माह्नू दा
रौह्न सदा अंग- संग
बख्शन साह् एह् माह्नू गी
दम साह् करै जदूं तंग
इ'यै बनदे औषधियां जदूं
माह्नू होन बमार
र्हीड़ आमला निम्म ते तुलसी
तुप्पी लैओ हर थाह्र
चुपचाप एह् फर्ज नभांदे
बनियै पैह्रेदार
नां बौंह्दे नां सौंदे
नां गै जंदे कुसै बी थाह्र।
अक्ख लग्गी जा डाक्टर दी
बेशक सज्जनो राती
पर नेईं सौन कदें बी बूह्टे
माह्नू जीवन साथी
साह् रोगियें गी जदूं डाक्टर
आखन जाओ प्हाड़
उत्थै बी एह् करदे सेवा
बनियै चीड़ - देआर
बिन बूह्टें दे चली नि सकदा
सज्जनो एह् संसार
नां बौंह्दे नां सौंदे
नां गै जंदे कुसै बी थाह्र|
साह् लैने बिच औन नि दिंदे
कदें कुसै गी थोड़
अम्ब, ब्रूटा, ढल्लन, टाह्ल्ली
रुम्बल कैंह्बल बोह्ड़
आक्सीजन दे एह् कुदरती
निरे बझोन सलंडर
रूप रब्ब दा इ'नें गी मन्नो
गुरु दुआरा ते मंदर
इंʼदे नै गै धरती बननी
सज्जनो सुर्ग दुआर
नां बौंह्दे नां सौंदे
नां सौंदे नां गै जंदे कुसै बी थाह्र|
जे सर्दी नै कदें कुसै ई
लग्गी जा खंघ- जुकाम
चाही च अदरक तुलसी पत्तर
करदे कम्म तमाम
कब्ज दे गैस अफारा जे कदें
करी जा कुसै ई नेड़ा
त्रिफले दा अदूं रूप धारदे
र्हीड़ आमला ब्हेड़ा
बिन बूह्टें नि होना सज्जनो
तुं'दा बेड़ा पार
नां बौंह्दे नां सौंदे
नां गै जंदे कुसै बी थाह्र|
सुंड जवैन मल्हट्ठी जीरा
सौंफ ते कुतै रसौंत
कुतै मन्नका मगां मेथरे
धनिया, कुट्ठ ते लौंग
इंटैंसिव केयर यूनिट जंगलें
इंʼदी बड़ी अनोखी ऐ
आटोमेटिक चलै ते डाक्टर
नां बिच नर्स खड़ोती ऐ
वैंटीलेटर चलै कुदरती
पवै नि मारो मार
नां बौंह्दे नां सौंदे
नां गै जंदे कुसै बी थाह्र|
नां थक्कन नां हुट्टन
दिंदे रौह्न सदा एह् पैह्रा
इक बराबर दिक्खन कदें नि
कुसै गी ऐरा- गैरा
अद्व मझाटै छोड़ै अपना
पवै जदूं बी लोड़
पर नि छोड़न साथ कदें एह्
सदा नभांदे तोड़
इंʼदे नै गै गर्मी सर्दी
बनै बसैंती ब्हार
नां बौंह्दे नां सौंदे
नां गै जंदे कुसै बी थाह्र|
धनवंतरी वैद एह् बूह्टे
बूह्टे वैद सुशैन
दुख बमारी सारी हरदे
इ'यै दिंदे चैन
धरती पर जे बूह्टें दा
नि होंदा नां नशान
माह्नू अंदर कदें नि चलदी
पराणापान दी तान
बूह्टें गी नि ढाओ राहो
जे जीना दिन चार
नां बौंह्दे नां सौंदे
नां गै जंदे कुसै बी थाह्र|
इ'यै गासा बदल चढ़ांदे
इ'यै बदल बर्हांदे
इंʼदे कारण मोर जंगलें
लम्मियां भाखां लांदे
इ'यै धोंदे वातावरण गी
रातीं दिनै दपैह्री
इंʼदे नै गै सूरज चमकै
बडलै नित्त सनैह्री
इंʼदे नै गै पक्खरुएं दे
औंदे रौह्न डुआर
नां बौंह्दे नां सौंदे
नां गै जंदे कुसै बी थाह्र|
इंʼदे नै गै सोभै चाननी
तारें दी बी लोऽ
रंग बरंगे फुल्लें च फ्ही
इ'यै भरदे खश्बोऽ
पैंछी स'ञै करन बसेरा
इंʼदे पर जदूं आई
चुरचुर सुनियै लग्गै जि'यां
जान्नी उतरी आई
इंʼदे नै गै स'ञ बडला
करदा नित्त शंगार
नां बौंह्दे नां सौंदे
नां गै जंदे कुसै बी थाह्र|
बुज्ज नारियल जन आह्लड़े
लमकन बूह्टै बूह्टै
जेह्दे उप्पर बेही पक्खरू
सुर्गी झूटे झूटै
बड़ ब्रह्मा एह् बब्ब खुआंदा
सभनें दा निर्माता
भैन भ्रा एह् जड़ी- बूटियां
तुलसी सब दी माता
करी दिक्खो हिरख इंदे नै
रक्खन नेईं दुहार
नां बौंह्दे नां सौंदे
नां गै जंदे कुसै बी थाह्र|
स्यालै जरदे ठंड ते पाला
जरदे धुंधां कोरे
भर गर्मी दे बिच बी जींदे
पींदे सब्र कटोरे
पुरश बझोंदे अवतारी गुरु
नानक यीशू राम एह्
कैह्र बर्हाओ किन्ना बी,
नि करदे त्राही माम एह्
पैर कुहाड़ी मारो नेईं
इंʼदे पर करियै वार
नां बौंह्दे नां सौंदे
नां गै जंदे कुसै बी थाह्र|
शंकर दा एह् रूप न बूह्टे
धुएं लेई एह् जींदे न
शुद्ध ब्हाऊ दा अमरत दिंदे
आपूं जैह्र एह् पींदे न
परसुआर्थ दा भाव नि लब्भना
इʼन्ना कदें मनुक्खें च
सामधाम ऐ लब्भै करदा जिन्ना
सज्जनो रुक्खें च
पूजा अर्चना करी लैओ इंʼदी
इंʼदा गै प्रचार
नां बौंह्दे नां सौंदे
नां गै जंदे कुसै बी थाह्र।
——————————-
