चल मेरी कविता
चल मेरे नै
चल अंबे दे बागें चलचै
माकड़ियें नै झोलु भरचै
घर लेई आह्न्नी
छछ्छा कुट्टी, म्हाणी रि‘न्नी
भरी टोकरु रुट्टियेँ कन्नै
भुक्खे ढिड्डें दी सूह् लाचै ।
चल मेरी कविता
चल मेरे नै
चल बस्ती दे अंदर चलचै
बेआसें मन आसां भरचै ।
चल मेरी कविता
चल मेरे नै
अक्खरें दे किश फुल्ल खड़ाचै
वीर सैनकेँ दी
कुर्बानी दे धागें इच गुंदी-गुंदी
बन्न-सबन्ने हार परोचै
फ्ही देसा दे गले च पाई
उं‘दी जै-जैकार बुलाचै
रिण-मुक्त अस बी किश होचै ।
चल अड़िये
नेईं अड़ियां कर तूं
गीत वियोगी गाने ताईं
चित्त मेरा परचाने ताईं
चल दोऐ अस इक-मिक होचै
जि‘यां काह्न ते काह्नै दी बंसी
इक-दुए गी खूब समझदे
मन-माफक
ओह् हर इक मन दी
पीड़ बंडांदे
प्रीत जगांदे
तूं मेरी ते, में आं तेरी
निं बौह्ना असें ढाइयै ढेरी ।
चल मेरे नै, चल चलने आं
बन्न-सबन्ने रुक्खैं मिलियै
भांत-सभांतें फुल्लैं रलियै
खूब मैह्केआं, खूब चैह्केआं
अक्खर-अक्खर बुनी सैलतन
रक्कड़-जन चपासम अंदर
जीवन दा कोई मैंतर फूकी
खिड़-खिड़ हस्सेआं, रस्सेआं-बस्सेआं
जीने दे जिरढ़े ढब दस्सेआं ।
आ, जिंद-जाने
आ, मेरी लाडो
चल इ‘यां एह् साथ नभाचै
सच्चे सुच्चे
किश सजरे नेह्
जीने दे हुन ढंग अपनाचै ।
