पुच्छो हां जो हे संगी-साथी, माता-पिता हे जां हे अम्मी-अब्बा
मरदे गै करदे ओ जिस दियां सिफ्तां, जींदे नुआढ़े च की गुण निं लब्भा ।
दिखदे गै मत्थे पर रेह् बट्ट पांदे, सिद्धी कुसै ने इक नेईं बाही
चलदा रेहा ओह् जिगरे नै फ्ही बी, जीवन दे रस्ते सब गाही-गाही।
नां गै कुसै ने कदें बात पुच्छी, नां ओह् कुसै केह्ड़ी मैह्फल च फब्बा
मरदे गै करदे ओ जिस दियां सिफ्तां, जींदे नुआढ़े च की गुण निं लब्भा ।
शांत नेईं जींदे जि’नें होन दित्ता, शांति अज्ज आत्मा दी ओह् मंगदे
बड़े दमुंहें लोक होंदे, यारो, नारण शा डरदे नां रूहें शा संगदे
बेशक करै कोई किन्ने तमासे, तुगी ते सारा गै पता ऐ, रब्बा
मरदे गै करदे ओ जिस दियां सिफ्तां, जींदे नुआढ़े च की गुण निं लब्भा ।
लोड़ां नां थोड़ां नां मर्ज गै पुच्छी, कीती कुसै निं दुक्खें दी कारी
पेखने करियै दस्सै दे कुसगी, रोंदे ओ कैह्सी हुन लोकाचारी
किन्नें गै छेकेआ उसगी बरेसा, मन्नी मनुक्खता पर काला धब्बा
मरदे गै करदे ओ जिस दियां सिफ्तां, जींदे नुआढ़े च की गुण निं लब्भा ।
तरस नेईं खाद्धा कदें कुसै ने, करदे गै रेह् लोक हरकत कमीनी
कुसै बी कारज जां मैह्फल च अक्सर, कीती नुआढ़ी सदा नुक्ताचीनी
गिने हे औंगली पर दोश केइयें, ‘केसर’ ने लिखी टकाया हाँ थ’ब्बा
मरदे गै करदे ओ जिस दियां सिफ्तां, जींदे नुआढ़े च की गुण निं लब्भा ।
होंदी ऐ जेकर ज़मीर चीज़ कोई, आपूं गै माह्नू की बेची खंदा
दुनिया चा कुसै दे जंदे गै दस्सो, तौले गै उसदा लगदा की मंदा
जीह्ब चमकदी तालू नै जाइयै, केरै की अत्थरूं मूंह् देई दब्बा
मरदे गै करदे ओ जिस दियां सिफ्तां, जींदे नुआढ़े च की गुण निं लब्भा ।
