चलो फ्ही होर हिरख बसाचै
परती माह्नू गी हिरख चखाचै
फ्ही गै सौखा जीना साढ़ा
घर-घर बंडी हिरख दोआचै ।
इस रौले-रप्पै छुड़ेआ बसारी
अग्गी उब्बलेआ, एह् कु’न्नी चाढी
इस गर्मी कोला हिरख बचाचै
परती माह्नू गी हिरख चखाचै
चलो फ्ही होर हिरख बसाचै।
दूर-दूर एह् रेहा सारै
इक दुए गी हक्कां मारै
फ्ही छंदा कीता हिरख बलाचै
परती माह्नू गी हिरख चखाचै
चलो फ्ही होर हिरख बसाचै ।
एह् धोखे कन्नै घेरै आया
त्रंगड़ी नै इस्सी बिच्च फसाया
एह् फसेआ मुशकला, एह् हिरख छुड़काचै
परती माह्नू गी हिरख चखाचै
चलो फ्ही होर हिरख बसाचै ।
एह् सुद्धा तरसेआ साल्लै अंदर
बाह्र मसीतीं, गुरुदोआरैं, मंदर
रोके दा फ्ही हिरख बलाचै
परती माह्नू गी हिरख चखाचै
चलो फ्ही होर हिरख बसाचै ।
पीड़ एह्दी जे समझै कोई
इस्सी सैह्को-सैह्की सुद्धी होई
जखमें एह्दैं हुन मल्हम लोआचै
परती माह्नू गी हिरख चखाचै
चलो फ्ही होर हिरख बसाचै ।
‘कादिर कुंडरिया’ रूह् गी समझाया
इस्सी बल्लें-बल्लें रेढ़ी चलाया
हुन सभनें रूहैं हिरख पोआचै
परती माह्नू गी हिरख चखाचै
चलो फ्ही होर हिरख बसाचै ।
