एह् जीवन

एह् जीवन नेईं ऐ
धुखने लेई
दुखने लेई 
झूरने लेई 
भुरने लेई 
कुढ़ने लेई।

एह् जीवन ऐ मड़ा:
आसां-मेदां, हीखी -तांह्गां 
जगाने गी।
चंगी माड़ी जो बी भागें च 
गल लाने गी।

साथी!
एह् बेला नेइऊं
सोने दा 
ढेरी ढाइयै बौह्ने दा 
दलीलां सोचने दा 
घोचां घोखने दा 
पीड़ां जोखने दा।

उठ जुनां
आलस खुट्टा
जीवन छुट्टा
मंजल दरेडी
पैंडा लम्मा
बत्त त्रेह्‌डी

पड़ांऽ- पड़ांऽ 
कर बसांऽ।

तुगी चलना ऐ
तुगी चलना ऐ
भाएं चल कल्ला
जां 
रल कुसै कारवां कन्नै
कुसै निं औना 
तुगी चुक्कन कुच्छड़ 
घर तेरै।