रूप तेरा, मालने, ऐसा मलाका देई गेआ
गासा जि’यां चन्न चढ़ेआ, इक भलेखा पेई गेआ।
छंदे तेरे मालने, तूं कुतै अवै ते कर
कोल साढ़ै बी कदें ते पल दो ब’वै ते कर
तेरे कन्नै गल्लें दा बी चाऽ असेंगी रेही गेआ
गासा जि’यां चन्न चढ़ेआ, इक भलेखा पेई गेआ।
कैसा, मोइये, तूं मनै दा चैन साढ़ा लुट्टेआ
साढ़े कन्नै केह् ही बीती, तूं नि, जान्ने, पुच्छेआ
चौरै बेल्लै झूरा इ’यै, जान साढ़ी लेई गेआ
गासा जि’यां चन्न चढ़ेआ, इक भलेखा पेई गेआ।
आले साढ़े नेईं सुने, उच्चे सुने नेईं हौकरे
बाह्ज तेरै कोई नेईं साढ़ा, लोक सारे ओपरे
तूं गै जिंद-जान साढ़ी, कोई नेईं तेरे जेहा
गासा जि’यां चन्न चढ़ेआ, इक भलेखा पेई गेआ।
प्रीत लाइयै तूं असेंगी सूली ऐसा टंगेआ
दो घड़ी नेईं चैन मिलेआ, साह् नेईं सौखा लंघेआ
चेता तेरा डेरे लाइयै कोल साढ़ै बेही गेआ
गासा जि’यां चन्न चढ़ेआ, इक भलेखा पेई गेआ।
रूप तेरा, मालने, ऐसा मलाका देई गेआ
गासा जि’यां चन्न चढ़ेआ, इक भलेखा पेई गेआ।
