त'वी धोऐ जेह्दे चाए-चाएं पैर
कोई रीस नेईं जम्मुऐ दी
एह्दे नेहा नेईं दूआ कोई शैह्र
कोई रीस नेईं जम्मुऐ दी
त'वी धोऐ जेह्दे चाएं-चाएं पैर
कोई रीस नेईं जम्मुऐ दी ।
मिट्ठड़ी जुबान सब्भै डोगरी न बोलदे
भाखां गाई कन्नें इच मिशरी न घोलदे
इ'नेंगी नेईं बझोंदा कोई गैर
कोई रीस नेईं जम्मुऐ दी
एह्दे नेहा नेईं दूआ कोई शैह्र
कोई रीस नेईं जम्मुऐ दी
त'वी धोऐ जेह्दे चाएं-चाएं पैर
कोई रीस नेईं जम्मुऐ दी ।
बाह्वे इच काली मां, बलौर सुकराला ऐ
त्रिकुटा इच वैष्णो दा भवन निराला ऐ
मेल्ले लग्गे रौंह्दे जित्थै चौरै पैह्र
कोई रीस नेईं जम्मुऐ दी
एह्दे नेहा नेईं दूआ कोई शैह्र
कोई रीस नेईं जम्मुऐ दी
त'वी धोऐ जेह्दे चाएं-चाएं पैर
कोई रीस नेईं जम्मुऐ दी ।
सुद्ध महादेव इच शिवें धूनी रमाई ऐ
कुंडेश्वर धाम बिशनाह्, खनूर राजा काई ऐ
मन ठारदी चन्हां दी ठंडी लैह्र
कोई रीस नेईं जम्मुऐ दी
एह्दे नेहा नेईं दूआ कोई शैह्र
कोई रीस नेईं जम्मुऐ दी
त'वी धोऐ जेह्दे चाएं-चाएं पैर
कोई रीस नेईं जम्मुऐ दी ।
