जाने आह्ले दी रेही पन्छान
हर दिलै च बैठी शान
अचानक इ’नेंगी होएआ केह्
सब हिरखी सीन्नै होए र्हान
हर दिलै च बैठी शान
जाने आह्लें दी रेही पन्छान।
इक अवाजा हां-हां करदे
बजुर्ग-बच्चें दी इज्जत करदे
मित्तर- यार न सब परेशान
हर दिलै च बैठी शान
जाने आह्लें दी रेही पन्छान ।
औखी मैह्फल असान बनांदे
दुएं दी पीड़ सीन्नै लांदे
उप्पर साढ़ै खूब हसान
हर दिलै च बैठी शान
जाने आह्लें दी रेही पन्छान ।
रीढ़ दी हड्डी काफले दे से
मित्तर-यारे दे बिच्च हीरा हे से
बस्ती-रस्ते बी होए बरान
हर दिलै च बैठी शान
जाने आह्लें दी रेही पन्छान ।
घर ते कोठा, मंजल चबारा
उं’दे साथैं लगदा हा प्यारा
जम्मियां कलियां आया तुफान
हर दिलै च बैठी शान
जाने आह्लें दी रेही पन्छान ।
चेतै औन ओह् दिन गुजारे
रुक्खियां यादां रेह् न स्हारे
सब्भै आखी एह् गलान
हर दिलै च बैठी शान
जाने आह्लें दी रेही पन्छान।
खाल्ली जगह हून भरचै कि'यां
उं’दियां यादां रुक्खियां रेहियां
कु’त्थै लभदे न नेह् इन्सान
हर दिलै च बैठी शान
जाने आह्लें दी रेही पन्छान ।
‘कादिर कुंडरिया’ पीढ़ ऐ पराई
तु’म्मी मड़ेआ छाती लाई
डुसकी-डुसकी सब्भै लगान
हर दिलै च बैठी शान
जाने आह्लें दी रेही पन्छान।
हर दिलै च बैठी शान
जाने आह्लें दी रेही पन्छान ।
