अज्ज मिगी बचपन फ्ही चेतै आई गेआ
अक्खें अग्गें उ’ऐ समां, अज्ज फ्ही छाई गेआ
चेतै आई गे मिगी खेढ ते खढौने सब्भै
सांबे दियें गैह्लियें, मदानें च पजाई गेआ
अज्ज मिगी बचपन फ्ही चेतै आई गेआ ।
सिगटें दी डब्बियें दे कैमरे बनाई लैने
बड़ै दे पत्तरें दे चश्मे सजाई लैने
पीपनी बर्हैंकड़ जां अंबे दियें गुलियें दी
गुद्दड़ पराने सीऐ, खि’न्नुं बनाई लैने
अक्कें दियां हाकियां, सफेदे दे बैट
प्लास्टिक परघालियै, ब़ॉल बनाई लैने
कार्क दी बॉल उड़कदी मता गै ही
दंद तड़ाई लैने, बुल्ल फटाई लैने
निक्के दा बैट दिक्खी, हास्सा मिगी आई गेआ
अज्ज मिगी बचपन फ्ही चेतै आई गेआ ।
गागर फिस्स खेढनी, सारे उंधे होए दे
शेर-बकरी च इक दुए नै जकड़ोए दे
अत्त-पत्त पताने च, बॉटनी ही सिक्खी लेई
ज़ूलोजी दे नुक्ते, रींघड़, तम्हूड़ियें सखाए हे
करेटें दी तार असें रौह्न कोई दित्ती नेईं
कूंढियां बनाई लेइयां, चक्कर बनाए हे
ग’रनें दे ब्हान्नै खौरै, किन्ने टिब्बे गाहे हे
माकड़ियें दे लालचें किन्ने सिर फटाए हे
बैरी प बज्झे दे, पंगूड़े कोई पाई गेआ
अज्ज मिगी बचपन फ्ही चेतै आई गेआ ।
इट्टें गी भोरी-भोरी हत्थें मैंह्दी लाई दी
रौंगली दात्तनें नै बुल्लें लाली आई दी
अज्ज फ्ही चेतै आया, अक्ख मेरी फड़कदी
नानी दिंदी तिरमरुए दे दाने, जीभ तिड़कदी
सनै दियें डांडिये दे सिगट बनांदे हे
ते कश लाई-लाई फिकरां डोआंदे हे
बच्छ-दुआह् गी लोक कट्टू-बच्छू गांदे हे
स्येऊ क-ला पुड़छने दे नंद बड़े आंदे हे
छप्पड़ियें-तलाएं दा गोत्ता मिगी लोआई गेआ
अज्ज मिगी बचपन फ्ही चेतै आई गेआ ।
मारी-मारी जोजड़े, इक दुए गी सतांदे हे
घाऽ दे सिट्टे अस तंबियें च चढ़ांदे हे
तंबियें गी गिल्ला करी, ब’न्नी फूकां मारियै
तारियां मारी-मारी, डबरें च न्हांदे हे
गीटे, शटापू कदें, जीरो-काटा खेढदे
ठीकरियां मारी-मारी, पानी प डोआंदे हे
गुल्ली-डंडा खेढी- खेढी बस निं हे करदे
लंग-डोडी, विष-अमरत बी खेढी लैंदे हे
अज्ज मिगी फ्ही कोई जागत बनाई गेआ
अज्ज मिगी बचपन फ्ही चेतै आई गेआ ।
लग्गी रौह्नी हेली-हेली, पूरे दिन बक-बक
प्लास्टिक बॉलें दी भुलदी निं टक-टक
निक्की जेही गैह्ली, ओह् साढ़े वर्ल्ड कप
मुफ्ते दी बैह्सबाजी, मुफ्ते दी खटपट
पौंदे हे रोंह्दे गफ्फे, म्हल्ला परेशान हा
इगो ते टैंशनें शा हर कोई अंजान हा
तंग जेही ग’ली च, गोहा हुन भरोचे दा
इत्थें गै कुतै मेरा, बचपन गोआचे दा
टक-टक करी कोई गैह्ली च पजाई गेआ
अज्ज मिगी बचपन फ्ही चेतै आई गेआ ।
ब्हाटें दी लिशकें च जान साढ़ी बसदी ही
तंगा- चोट, डी, गुत्ती, खेढदे चरखड़ी ही
कल्ली-जोटा खेढियै बोझे भरी लैंदा हा
भागला, फरोजी ब्हांटा मेरे कश रौंह्दा हा
फट्टियें गी बैरिंग लाई, गड्डियां बनांदे हे
बीड़ियें दे धुंऐं कन्नै, घाड़ बि’न्नी लैंदे हे
अज्जै जेहे कंगाल अस कदें बी निं होए हे
कागदें दे ज्हाज अस पानियैं तरांदे हे
मीरियां खुस्सी कु'न, पैहे हत्थ फड़ाई गेआ
अज्ज मिगी बचपन फ्ही चेतै आई गेआ ।
