बाह्रें क्रोहें पर दीआ बलना
बैर-भाव अदूं कुतै निं पलना ।
लगभग सारे जाने ढेई
सज्जन अपने जाने सेई
सूरज खुशी दा जाह्ग घरोई
रौह्ग जदूं फ्ही कोई, कोई
कुदरत ने जदूं माह्नू स'लना
बाह्रें क्रोहें पर दीआ बलना ।
सत्त बगान्ना अपना होना
अम्मा जाया अदूं बझोना
भुक्ख जदूं दुए दी होग
माह्नू दा अदूं मुल्ल बझोग
सारें नेकी उप्पर चलना
बाह्रें क्रोहें पर दीआ बलना
अदूं भेदभाव निं रौह्ना बिंद
दुए दी खातर कढङन जिंद
आड़ी-बन्ने सब मुक्की जाने
बीऽ हिरखै दे सारें राह्ने
सभनें हिरखी रंगै ढलना
बाह्रें क्रोहें पर दीआ बलना ।
मिन्नतां करियै कोल बुलाना
इक दुए दा मान बधाना
नफरत दिलें चा जाह्ग धनोई
इकजुट सारे जाह्ङन होई
अदूं कुसै निं कुसै गी छलना
बाह्रें क्रोहें पर दीआ बलना ।
बीती गेआ हुन बीह् सौ बीसा
रौह्ना मुहम्मद नां गै ईसा
धर्म निं रौह्ना कोई बने दा
रौह्ग सनातन सने तने दा
माह्नू बिच माह्नू ने रलना
बाह्रें क्रोहें पर दीआ बलना
जाति-वर्ग निं कुसै ने दिक्खना
सभनें किट्ठे रौह्ना सिक्खना
बत्त सुज्झनी अदूं फ्ही अगली
कुदरत ने जदूं करवट बदली
लोकें दा कम्म-काज बदलना
बाह्रें क्रोहें पर दीआ बलना ।
सभनें किट्ठे होइयै बौह्ना
प्यार-भाव नै सारें रौह्ना
कदें निं कुसै दा होग निरादर
होग बुजुर्गें दा मुड़ी आदर
खीर हत्थें गी पौना मलना
बाह्रें क्रोहें पर दीआ बलना ।
चढ़ियै जिसने नेईं घरोना
सारे उसी गलान करोना
थोक दे स्हाबें जिसलै मरना
पिच्छुआं कुसने कुसदा करना
कि'यां पुत्तरें बैंस फ्ही चलना
बाह्रें क्रोहें पर दीआ बलना।
म्हाभारत दा इक बी योद्धा
दस्सो, बैंस चलै दा कोह्दा
नेईं रावण दे वंशज रेह्
नेईं गै योद्धा कैंस जनेह्
मरना, रुढ़ना सारें गणना
बाह्रें क्रोहें पर दीआ बलना ।
दूर फ्ही सज्जनो केईं क्रोह्
रातीं प्हाड़ें फ्ही दिक्खियै लोऽ
उसलै बिंद क स्हारा थ्होना
उत्थै बी कोई बसदा होना
उच्च जदूं बी भांबड़ जलना
बाह्रें क्रोहें पर दीआ बलना ।
