एह् कनेहा डर-त्राह् दा काल ऐ
चबक्खै लपटोआ करदा
अश्कें गरड़जाल ऐ
कैसा, कनेहा
चढ़ेआ एह् साल ऐ
मन बेचैन
साक-सबंधी किरतघान
पेदा कनेहा खाल ऐ?
गेदी उड्डी नींदर
लब्भा दा काल समुंदर
फंघै लग्गे दा जंदर
इस काल दा अपना डमरू
अपना ताल ऐ
बेसुरत जन जिंद
किंद रेही निं बिंद
हत्थैं बचै निं थिंद्ध
खेढी कुसै चाल ऐ
अपनी-अपनी लग्गी दी
ठग-मठग्गी दी
फिरका-फिरकी अग्गी दी
राही कुसै कंडेआरी राह्ल ऐ
नाकैं जग्गा 'रदे
गाह्कें ई ठग्गा 'रदे
फाके लग्गा 'रदे
कुसै दे मुक्के चौल
कुसै दी मुक्की दाल ऐ।
एह् कनेहा डर-त्राह् दा काल ऐ
चबक्खै लपटोआ करदा
अश्कें गरड़जाल ऐ।
