पीली-पीली स'रेआं लेई आई पीले हार बसंती ओ
बाह्ज तेरै निं चंगी लगदी, अड़िये ब्हार बसंती ओ ।
भरी घड़ोले कुस ने डोह्ल्ले पीले रंग बसार
पीली सेज बिछी गेई धरती, सुंदर बड़े शंगार
मस्ती दे बिच आलम सारा हर इक थाह्र बसंती ओ
बाह्ज तेरै निं चंगी लगदी, अड़िये ब्हार बसंती ओ ।
पीला-पीला चन्न-चाननी, पीले अंबर तारे
पीली पाई पशाकी बैठे पीले खेतर सारे
पीले फुल्ल खिड़े हर पास्सै, थाह्रो-थाह्र बसंती ओ ।
पीली-पीली चादर-चुन्नी, पीली कुरती तेरी
रूप तेरे ने घायल कीता सुद्ध-बुद्ध भली बतेरी
छैलो, छैल छलैपा तेरा तूं कोई नार बसंती ओ
बाह्ज तेरै निं चंगी लगदी, अड़िये ब्हार बसंती ओ ।
पीली गुत्त-परांदी तेरी, पीले-पीले गैह्ने
मेरै बाह्ज कुसै निं तेरे सौ-सौ नखरे सैह्ने
तेरो-तालन, बड़ी मजाज़, बड़ा टंगार बसंती ओ
बाह्ज तेरै निं चंगी लगदी, अड़िये ब्हार बसंती ओ ।
पीले पाए पीतांबर काह्न्नै, पीले-पीले राधा
राधा दे बिच काह्न्ना बसदा, काह्न्नै दे बिच राधा
इक्क दुए बिच दोऐ गोआच्चे, जुड़ी गे तार बसंती ओ
बाह्ज तेरै निं चंगी लगदी, अड़िये ब्हार बसंती ओ ।
