मिगी चरखे ने पाई दित्ती काह्ल
मीं चरखा कि’यां कत्तना
हत्थ लांदे त्रुट्टी जाऽ एह्दी माह्ल
मीं चरखा कि’यां कत्तना ?
चाऽ मनै दे में कत्तने हे सारे
दिन-ध्याड़ै इन दस्सी दित्ते तारे
आवै नेईं मिगी किश आल-माल
मीं चरखा कि’यां कत्तना
हत्थ लांदे त्रुट्टी जाऽ एह्दी माह्ल
मीं चरखा कि’यां कत्तना ?
केईं बारी मीं एह्दा त्रक्कला संढेआ
एह्दे परा बारियै गुड़ बी हा बंडेआ
सोची-सोची होई ‘आं बेहाल
मीं चरखा कि’यां कत्तना
हत्थ लांदे त्रुट्टी जाऽ एह्दी माह्ल
मीं चरखा कि’यां कत्तना ?
बड़ी रीझें कन्नै चरखा हा बनोआया
चित्त-लग्गना निं दनां कुसै भाया
कुसै नेही ऐ बगाड़ी एह्दी चाल
मीं चरखा कि’यां कत्तना
हत्थ लांदे त्रुट्टी जाऽ एह्दी माह्ल
मिगी चरखे ने पाई दित्ता काह्ल
मीं चरखा कि’यां कत्तना ?
