गज़ल

दर्द बी बंडदी रेही ते पीड़ बी जरदी रेही 
ज़िंदगी बी मेरे कन्नै डाम गै करदी रेही ।

भुल्लनी ही कत्थ जेकर खीर सारी तां भला
ज़िंदगी तूं मेरे कन्नै ङ्हूरे की भरदी रेही ?

दिन कपाह् दी डोडियां हे किरदे-किरदे गे किरी 
उम्र सारी कत्तियै ,क्या ज़िंदगी ,छरदी रेही ।

चाननी दे फंघ लाइयै,डार बी उड्डे केईं 
पर कदें जे आस डुब्बी ज़िंदगी तरदी रेही ।

बेदना दी फि’म्मनी बी नेईं भलोंदी ऐ कदें 
म’लम बी लाई कदें तां जखमै इच चरदी रेही ।

ज़िंदगी दा, चर्बा बी, आसान नेईं ऐ, दोस्तो ।
मौत ते ज़िंदा रेही पर ज़िंदगी मरदी रेही ।