धीआं पुत्तरें शा होंदियां प्यारिया
लाड़ मता लायां, बावला।
इ’यै भागें दियां खोह्ल्लन दोआरियां
लाड़ मता लायां बावला।
लोक बड़े भैड़े जेह्ड़े धीयां दुत्कारदे
पुत्तरें गी चूरियां ते धीआं फाक्कै मारदे
मुंहां कूंदियां निं झल्ली दुश्वारियां
लाड़ मता लायां बावला ।
धीएं कन्नै घर बनै सुर्ग-दोआरा ओ
धीआं दान करी होंदा पार-तोआरा ओ
धीआं समझो निं कदें बी लाचारियां ओ
लाड़ मता लायां बावला ।
फुल्लें कोला 'किप्पी' धीआं नाजक न होंदियां
कोमल दर्हैंकें साहीं दिनें च मठोंदियां
टुरी जंदियां न मारियै डोआरियां ओ
लाड़ मता लायां बावला ।
