मंडी भरोची मुस्कानें दी
लग्गी बोल्ली अरमानें दी।
प्हाड़ियें दा म्हल्ला, पुरानी मंडी
जगरातें च जागदी गोल मंडी
फत्तु चगान, सब्जी मंडी, परचून दकान
नुआढ़े सामनै कताबें दी दकान।
काली जन्नी, मोती बजार, पक्का डंगा, राजे-दी-मंडी
मंडी भरोची मैंह्गे-सस्ते समानें दी
मुल्ल लगांदे, मुल्ल चुकांदे
लग्गै बोल्ली तांह्गें दी।
सज्जियां दकानां, सज्जे दकानदार
सज्जेआ माल, सज्जे मालदार
मकाबला सज्जने-सजाने गी
मोटियां साम्मियां तगड़ा बपार।
खरी शा खरी खरीददारी
कुतै लैनदारी, कुतै देनदारी
कुतै बेरोजगारी, कुतै रेज़गारी
जार-जार, चित्थड़े-चित्थड़े होंदी लचारी।
नलामी च नलाम होंदे अरमानें दी
मंडी भरोची मुस्कानें दी।
------------------------------
