ओ मेरे माही ने लेआंह्दी
मेरे जोह्गी मटर-माला
सड़ी जाना गोआंढनियें
पेई जाना जाला
ओ मेरे माही ने लेआंह्दी
मेरे जोह्गी मटर-माला।
हत्थ-मूंह् धोई जदूं माला गल पान्नीं
मेरा रूप दिक्खी चन्न शर्मांदा
अंबरै इच छप्पी जंदे अंबरै दे तारे
जदूं नच्चै मेरी गुत्ता दा परांदा
ओ दिक्खी मस्ती मेरी
मोरें गी आइयां पाने पाह्लां
ओ मेरे माही ने लेआंह्दी
मेरे जोह्गी मटर-माला ।
बौरी जन होई बागें फिरां आऊं
मेरे कन्नै-कन्नै कोयल गांदी
झुलदी ब्हा चीड़ें दी सेही होंदी जि’यां
मिट्ठी-मिट्ठी बौसरी बजांदी
ओ लग्गी जाऽ निं नजर कोई
माला चुन्नी हेठ छपालां।
ओ मेरे माही ने लेआंह्दी
मेरे जोह्गी मटर-माला ।
