‘में’ दी गागर खाल्ली कीती
‘इश्क’ ने अंदर पैर टकाया
‘में’ ते सफर लमेरा कीता
दर मुरशद दा नजर निं आया ।
पूरब दा लश्कारा मिलेआ
सूह् परभाती बिच्च थ्होई
घुप्प-घनेरे रस्तै पेदे
आस-जुगनुऐं हौंसला पाया
‘में’ ते सफर लमेरा कीता
दर मुरशद दा नजर निं आया ।
शिकल दपैह्री चुब्भन रिश्मां
गेड्डै जंगल, जाड़ एह् नदियां
परबत औखा सर करने तै
‘में’ बिच्च ‘में’ ने जिगर थम्हाया
‘में’ ते सफर लमेरा कीता
दर मुरशद दा नजर निं आया ।
धुर शिखरें तक पुज्जने ताईं
उमर-ब'रें दी बाजी लाई
न्हेरें पर छानन नेईं छाया
सुन्नी रातियें पैर बधाया
‘में’ ते सफर लमेरा कीता
दर मुरशद दा नजर निं आया ।
इक ‘में’ मेरे जनम दा हाणी
दुए ने ब्रह्मांड रचाया
अजें मेरा में जीव ञ्याना
अजर-अमर में समझ निं आया
‘में’ ते सफर लमेरा कीता
दर मुरशद दा नजर निं आया ।
