कदें हसदे, कदें रोंदे न नैन
चेतें दे हार परोंदे न नैन
भार एह् किन्ना ढोंदे न नैन
चेतें दे हार परोंदे न नैन ।
सोचें एह् कीते बमार न नैन
पीड़ें एह् कीते लचार न नैन
मन पापी गुनाह्गार न नैन
मन चंगा ऐ तां ब्हार न नैन
चित्त हौला तां सौंदे न नैन
चेतें दे हार परोंदे न नैन ।
दिल जे चोर तां चोर न नैन
प्रीत लग्गै तां चकोर न नैन
बड़े गै एह् चित्तचोर न नैन
कदें ते घटा घनघोर न नैन
बेह्ल्ले कदें निं बौंह्दे न नैन
चेतें दे हार परोंदे न नैन ।
सुरमे आह्ले किश होर न नैन
इ’यां रौह्न तां कमजोर न नैन
बुढ़ापे आह्ले मजबूर न नैन
लब्भै जे सुख तां, पसोंदे न नैन
चेतें दे हार परोंदे न नैन ।
दिल लग्गै तां नशीले न नैन
प्रीतम लब्भै, शरमीलें न नैन
मंदा लग्गै ग़मगीन न नैन
खुशियें नै रंगीन न नैन
बिछड़ै प्रीतम बतोंदे न नैन
चेतें दे हार परोंदे न नैन ।
द’ऊं दिलें दा प्यार न नैन
प्रेमियें दा संसार न नैन
हुटदे करी इंतजार न नैन
कुल संसारै दा सार न नैन
किन्ने सुखने संजोदे न नैन
चेतें दे हार परोंदे न नैन ।
देह् जे नरोई, नरोए न नैन
रोई-रोइयै भरोंदे न नैन
भारै दे हेठ दबोंदे न नैन
खारें नै फंघड़ू धोंदे न नैन
चेतें दे हार परोंदे न नैन ।
होऐ नींदरा तां लाल न नैन
सुखें-दुखें दे भ्याल न नैन
धन होऐ, मालामाल न नैन
ज्ञान दी लोई नेहाल न नैन
ऐंत बेल्लै बंद होंदे न नैन
चेतें दे हार परोंदे न नैन ।
कदें हसदे, कदें रोंदे न नैन
चेत्तें दे हार परोंदे न नैन
भार एह् किन्ना ढोंदे न नैन
चेतें दे हार परोंदे न नैन ।
