ढाओ कुर्सियां पाओ हार, नाह्रे मारो इं’दे चार
इ’नें गै कच्चे पक्के करने, इ’नें गै देना रोजगार
ढाओ कुर्सियां पाओ हार, नाह्रे मारो इं’दे चार ।
घर-घर लोकें खुशी मनाई, इ’नें गै बेड़ी लानी पार
घर बेहियै एह् सौदे करदे, बने दे साढ़े ठेकेदार
ढाओ कुर्सियां पाओ हार, नाह्रे मारो इं’दे चार ।
कम्म-काज सब छोड़ी अपना, भाशन इं’दे सुनो विचार
कदें पारा दा ब’रदे गोले, कदें पौआ दी बरखा दी मार
ढाओ कुर्सियां पाओ हार, नाह्रे मारो इं’दे चार ।
कुसै गरीबी दूर निं करनी, खानी हत्थैं करियै कार
इं’दे हत्थैं ओह् लकीरां, बेह्लियां खानियां, झूटनी कार
ढाओ कुर्सियां पाओ हार, नाह्रे मारो इं’दे चार ।
इ’नें गै लस्सी-पानी देना, इ’नें गै देना ढोडा-अचार
इ’नें गै भुक्ख-त्रेह् चुकानी लाइयै टोल-प्लाजे चार
ढाओ कुर्सियां पाओ हार, नाह्रे मारो इं’दे चार ।
जो जनरेटर देऐ निं पावर, कैह्सी जोड़ो ओह्दे नै तार
हकीम भी बिंद बदली दिक्खो, टुट्टै जे नेईं बिंद बुखार
ढाओ कुर्सियां पाओ हार, नाह्रे मारो इं’दे चार ।
इक्कला मोदी कुसगी दिक्खै, जैह्र फैले दा अंदर-बाह्र
आओ, सांझ-भेआली करचै बेहियै भाई इकट्ठे चार
ढाओ कुर्सियां पाओ हार, नाह्रे मारो इं’दे चार ।
मोदी नांs दी किन्नी खानी, अपनी बी किश दस्सो कार
इस बारी फ्ही देओ मौका, नेईं तां धिक्के मारो चार
ढाओ कुर्सियां पाओ हार, नाह्रे मारो इं’दे चार ।
दवा हमेशा कौड़ी होंदी तां गै अंदर करदी कार
सिर मनोआई फ्ही पुच्छना, अज्ज हा भाइया केह्ड़ा बार
ढाओ कुर्सियां पाओ हार, नाह्रे मारो इं’दे चार।
उस मालक कशा डरदे रौह्ना जिस करोना दित्ती मार
‘रायपुरिये’ दी गल्ला पर बी तुस करेओ सोच-विचार
ढाओ कुर्सियां पाओ हार, नाह्रे मारो इं’दे चार ।
