डरौने ख्याल
सोहै स्याल
जीना मोहाल ।
जी करदा ऐ
जे इं’दी संघी घोटी ओड़ां
जां फ्हेर इ’नेंगी घसीटियै
चन्हां दे कंढै लेई जां
ते धिक्का मारियै
रोह्ड़ी आमां
नेईं ते इ’नेंगी
इक पोटली च पां
ते पक्की गंढ मारियै
तीली लां, सालम फूकी टकांऽ
पर फ्ही में सोचनां
जे एह् ते सलगदे धुंऐं दी
लटें आंह्गर न
जिं’दा सभाऽ गै सलगदे रौह्ना ऐ
ते इ’नेंगी हत्थें च लेइयै
ना संघी घोटी सकने आं
ना साड़ी सकने आं
न रोह्ड़ी सकने आं
ना इ’नेंगी गोली बजदी ऐ
ना गै फट्ट
बेह्तर इ’यै होग
जे इं’दे कोला
छिंडा करी लैता जाऽ
ते नाता त्रोड़ियै
छड़ा औंदे-जंदे दिक्खेआ जाऽ
तमाशबीन बनियै
मझाटै खड़ोइयै।
----------------------
