अस्तित्व

मेरे सरकारी स्कूला
तेरी जरखेज पैली च
साढ़ी राही दी पनीरी
लुंगर निकलदे गै
पुट्टियै दुए थाह्‌र 
लाई दित्ती जंदी ऐ
अस रेही जन्ने आं 
हत्थ मलदे गै
पर जेकर 
दुए खेत्तरै दी पनीरी 
पुट्टने ताईं
बधान्ने आं हत्थ
तां नेकां कंडे
चुब्भां लांदे न
फनीअर डंगने ई औंदे न
गुज्झे।

तेरी पैली च उग्गी
उस्सरी,मठोई
जि’नें छूही लैत्ता
तरक्कियें दा गास
उ’नें अपने सिट्टे चा
कोई इक्क बी बीऽ
तेरी पैली च लाना
मनासब निं समझेआ।

मेरे सरकारी स्कूला
तेरे अस्तित्व ते होंद गी बचाने दे जत्न जारी न
उद्दमें दी मोकली हांबैं
तां जे
तूं कुतै 
खण्डरें च निं बदलोई जाएं समें कन्नै
मुंहा प जिच्चर ऐ
मास्टरी मर्‌हक्खा
तेरे अस्तित्व दी जंगा च
सदा खड़ोते दे रौह्‌गे
तेरे कन्नै बरोबर
ते तेरी क्यारियें च 
मेदें दी नमीं पनीरी
अस लागे 
तेरी सग्गोसारी ताईं।