बड़ा चेतै औंदा ऐ
चन्न मेरे शैह्र दा
मेरा पक्का मित्तर हा ओ
भामें मन दोआस होऐ
जां फ्ही खुश
मेरे मना दे हर इक भाव गी
समझदा हा चन्न मेरे शैह्र दा ।
केईं बारी रुस्सी बी जंदा हा
ते जदूं में मिलने गी जाना
ते बदलें च छप्पी जंदा हा
में बी खड़ोते दे रौह्ना
माड़ी जेही झांकी मारदा हा ते
फ्ही छप्पी जंदा,
केईं बारी मी समझांदा बी
के दुख तकलीफें कोला घबराना नेईं
जि’यां न्हेरे बाद चानना
उ’आं गै खुशियां बी औंदियां गै न
केईं बारी दिनै च बी नज़र औंदा
पर होंदा किश दोआस ग,
आपनी चाननी कोला बिच्छड़े दा होंदा हा,
पर रात होंदे गै
पैह्ले आह्ला लेखा
खुश, हंसमुख ते शलैपा उ'दा निखरी जंदा
समें कन्नै में शैह्र बी बदलेआ
ते बदली गेआ मेरा चन्न बी
ब'रे बीती गे ते
समां गै निं लग्गा
समाना पास्सै दिक्खने दा
अज्ज गेआ हा उस्सी मिलन
पर ओह् पैह्ले जनेहा निं रेह् दा
ना उ'न्नै किश पुच्छेआ
ना में किश दस्सेआ
पता निं ओह् बदली गेआ
जां मेरा नज़रिया।
