ओह् लमकोई दी ऐ
धरतै ते गासै मझाटै
जे पलांबदी गासै गी
तां पटोई जंदे पैर धरती परा
जे धरती 'र बनकांदी पैर
तां छुड़कदा जंदा गास।
सदियां लग्गियां उस्सी
अपने जीवकोशें गी
लचीला करदे
अपने जुस्से गी
रूपांतरत करदे।
इक-इक जीवकोशै दी बनौट
करी लैंदी हून ओह् लमेतरी
सख्ती नै बनकाई रक्खे दे
धरती 'र पैर।
फगड़ी लैंदी ऐ
जेल्लै मन आखै
ओल्लै गै गास।
सुपर-वूमन तगर दी
ओह्दी इवोल्यूशन लेई.
झेल्ली उन्न बेस्हाबी पीड़
बगाया बेस्हाबा नीर
रगें च जम्मे दे
लहुऐ दे गड़चिल्ले
परघलाइयै रवां करी दित्ते उऱन्नै
अपने हौंसले दी गरमैश कन्नै।
उस्सी आई गेदी ऐ जाच
अपने अंदर, अपना वजूद समेटने दी बी
थक्कियै चूर होंदी जिसलै
तां कठेरी लैंदी अपना-आप
अपने आपै इच्च
इक चक्की आंह्गर।।
दनां करियै बसांऽ
फ्ही खलारी ओड़दी अपने-आपै गी
गासै ते धरतै मझाटै
फ्ही-फ्ही कठेरने गी।
