जे मेरे जलने दी गै तुई ही बास नेईं आई
तां फ्ही चमक मेरी ही तुई की रास नेईं आई ।
मनै दे बैरियै गी किश सबक सखाना हा
बा ऐन वक्त प रक्खी भड़ास नेईं आई ।
में वक्त कन्ने गै टुरेआ हा, नेईं रेहा पिच्छें
बा फ्ही बी समझै च एह्दी शनास नेईं आई ।
एह् मन जो अज्ज बी जेह्दी मसाल दिंदा ऐ
ओ नेक नीत जो मापे ऐ बास, नेईं आई ।
मनै दे डार बी तुपदे गै रौंह्दे गास नमें
अकाशगंगा बी तां इसगी रास नेईं आई ।
में अपनी तंदें दी गै गंढ-त्रुप्प करदा रेहा
तां तंद साहें दी बखली, सुआस नेईं आई ।
ही कौड़तन मेरी, मेरे गै जात घुलदी रेही
तां मेरे जातै च कोई होर चास नेईं आई ।
जि’नेंगी चेतै करी घुट्ट खूनै दे हे भरे ।
हुन उं’दें नांऽ दी बी छात्ती चा लास नेईं आई ।
