अज्ज बूह्टैं पौंगर फुट्टै दी
हर थांऽ हरेआली सु'ट्टै दी
कुदरत बिच जीवन आई गेआ
हर बूह्टै- बूह्टै छाई गेआ
अज्ज गंढ सुर्ती दी खोह्ल्लियै
बंडै कुदरत तोल्ली- तोल्लियै
अज्ज होश फिरी गेई रुक्खें गी
पशु- पक्खरुएं ते मनुक्खें गी
गाई- गाइयै कोयल हुट्टै दी
अज्ज बूह्टैं पौंगर फुट्टै दी ।
सूरज ने अंबर मल्लेआ ऐ
बदलें गी भलेआं स'लेआ ऐ
अज्ज जाल सनैह्री बिछी गेआ
रंग काला- काला म्हिसी गेआ
नेईं पाला धुंद ते कोरा ऐ
नेईं बदलें दा कुतै छौरा ऐ
बरखा दी रिमझिम त्रुट्टै दी
अज्ज बूह्टैं पौंगर फुट्टै दी ।
उतरे पत्तर पराने रुक्खें दे
सारे टल्ले बी गर्म मनुक्खें दे
नमें- सैल्ले टल्ले ला करदे
बूह्टे अज्ज खुशी मनाऽ करदे
कुदरत गी फुल्ल चढ़ाइयै ओह्
अज्ज मंद- मंद मुस्काइयै ओह्
बक्खरी ऐ नुहार अज्ज रुत्तै दी
अज्ज बूह्टैं पौंगर फुट्टै दी ।
कुदरत बिच जीवन ढली पेआ
धरती राहें बूह्टैं चली पेआ
अज्ज स'रेआं खेतरैं फुल्ली ऐ
सुरगै थमां कुदरत उ'ल्ली ऐ
कुतै बूह्टैं पक्खरू गा करदे
कुतै लोरी भौर सनाऽ करदे
दिलै रेही- रेही सरगम उट्ठै दी
अज्ज बूह्टैं पौंगर फुट्टै दी ।.
