होऐ निं जेह्दी सम्हाल, ओह् घर ढेई जाना
कंध होई गरसाल, ओह् घर ढेई जाना ।
खोट, कपट, छल जेह्दिया नीहां
सच्च फंडाकै ठैह्रना कि’यां
बरखा दी भरमाल, कोठु चेई जाना
कंध होई गरसाल, ओह् घर ढेई जाना ।
बरगा-बरगा बैह्मैं भरेआ
डर-त्राह्के ने जिसगी फड़ेआ
झूरे दा जंजाल इसने देई जाना
कंध होई गरसाल, ओह् घर ढेई जाना ।
जिस घर अंदर भरम समाया
निश्चे दी टुटदी जा काया
जिसदी मंदड़ी चाल, रस्तै रेही जाना
कंध होई गरसाल, ओह् घर ढेई जाना ।
में घर अपना आप बनाना
बिच्च र’वै प्रीतम मनभाना
किंद निं र’वै रोआल, प्रीतें पेई जाना
कंध होई गरसाल, ओह् घर ढेई जाना ।
