जिंदगी ते कुसै दी बी निं होंदी फजूल ऐ
जीने गित्तै मंगै पर रोज गै मसूल ऐ ।
मसूल कदें जिगरे दा, कदें तदबीर दा
कदें ध्रुक-ध्रुकियें ते अक्खियें दे नीर दा
तरस कदें खंदी नेइयों कुसै पर मूल ऐ
जीने गित्तै मंगै पर रोज गै मसूल ऐ ।
मुख्त भला दुनिया च थ्होंदा बी तां केह् ऐ
बिकदी ऐ, सज्जनो, नकारी इत्थै खेह् ऐ
मता मुल्ल मंगै चीज, ऊल ते जलूल ऐ
जीने गित्तै मंगै पर रोज गै मसूल ऐ ।
मिली दी जिंदगी, जीनी बी नभानी बी
हर हाल्लै मन्ननी एह्दी मनमानी बी
माह्नू गित्तै छुड़दी बनाई कदें सूल ऐ
जीने गित्तै मंगै पर रोज गै मसूल ऐ ।
जिद्दी इक-रुखी कदें बनी जा एह् जिंदगी
कुप्पड़ै दे साहीं कदें तनी जा एह् जिंदगी
सुनदी निं दलील, एह्दा अपना असूल ऐ
जीने गित्तै मंगै पर रोज गै मसूल ऐ ।
नमीं-नमीं रुत्त, यरो, सदा फेरा मारदी
दिंदी ऐ घरैखियां, ते कदें पुचकारदी
कदें अनुकूल होई जा, कदें प्रतिकूल ऐ
जीने गित्तै मंगै पर रोज गै मसूल ऐ ।
