नमां ईशर

कु'न बिधमाता?
कु'न भाग-बधाता ?

में म्हेसी आयां
काह्‌रां हत्थें दियां
काह्‌रां मत्थे दियां।

भागैं भरोसै जे होंदा
तां जीन नेईं
जून भोगा दा होंदा।

अपनी बत्त
आपूं फड़ी ऐ
अपनी लड़ाई
आपूं लड़ी ऐ।

उस डंडकारै च
अ'ऊं पाई दित्ती ऐ
इक घास नमीं
ते
मी जकीन ऐ जे
ओह् घास जरूर बगग
ते उस पर चलग
कोई न कोई राह्-रहांदू
कोई काफला
इक दिन।

मेरा धरम
मेरा करम
मेरी आस्था
ते
मेरा ईशर--
मेरा हील्ला ऐ
मेरी कोशश ऐ
मेरा जतन ऐ।

मी बौह्‌ड़ेआ नेईं
मी पुक्करेआ नेईं
थान कोई
बुत्त कोई।

तां करी 
मी तुप्पना पेआ--
नमां ईशर!