जिंदगी दी कताब इ’यां गै पेई दी ही
थपथपांदी ब्हाऽ गुनगनांदी चली
ब’रके परताई गेई ।
मिट्ठे-कौड़े हिरख भरोचे
सिद्धे-सादे, भोले-भाले
दिलै दी परतें च बसदे
इक्कै रस्ता अपनांदे
मिलने दा रस्ता तुपदे।
बेइख्तयार निकलदी बेबस आह्
मनै दी मैल मटाऽ शबनम दे कतरें च
तन-बदन सिंदूरी सजाऽ
स’ञ-बडला संदूरी करदे
सुरें दी श्याई च डुब्बी सहाफत
इक-इक सुर दी करै हफाजत
ऐसी हफाजत च पेई दी
थपथपांदी ब्हाऽ गुनगनांदी चली
ब’रके परताई गेई
कौड़े-मिट्ठे, मुस्करांदे, रोंदे, हसदे
इक-दुए दी सुध लैंदे
जानदार, सरगर्म धोखाधड़ी नकारदे।
…………………………………………….
