बछोड़ा

बड़े चिरें दी गल्ल ऐ, में पुच्छेआ हा तुगी 
बछोड़ा केह् होंदा, पता ऐ तुगी? 
बड़े जोशै नै तूं हस्सियै परत्ता हा दित्ता-- 
बछोड़ा केह् होंदा, पता ऐ मिगी 
इ’यै ना-- 
जि’यां त्रुट्टे दा कोई अंग, जि’यां छुड़के दा कोई संग 
जि’यां डाह्‌ल्ली शा खिंडे दा फुल्ल, खिंडी बागें शा बुलबुल 
जि’यां जिस्मै शा खिंडे साह्, जि’यां लग्गे दा कोई फाह् 
जि’यां चन्न ते चकोर, जि’यां गुड्डी शा त्रुट्टी डोर।

जां इ’यै ना-- 
जि’यां रांझे शा खिंडी हीर, जि’यां मच्छी बिन नीर 
जि’यां गद्दने दा परदेसी, जि’यां कमान्ना निकलेआ तीर 
जि’यां कूंजें दे खिंडे डार, जि’यां फुल्लें शा रुस्सी ब्हार 
जि’यां लुट्टे दा कोई प्यार, जि’यां त्रुट्टे दा कोई करार 
जि’यां सोहनी ते महिवाल, जि’यां शीरी ते फरहाद 
जि’यां पपीहे दी फरेआद, जि’यां भुल्ली जाऽ कोई याद 
जां इ’यै ना 
जि’यां अक्खें शा रुस्से सुखने, जि’यां मेलै गोआचे अपने 
जि’यां सिप्पै शा खिंडे मोती, जि’यां दिये शा बिछड़ी जोती 
जि’यां मरुथल ते पानी, जि’यां बचपन दी कोई क्हानी 
जि’यां समुंदर ते कनारा, जि’यां चलदी समै दी धारा 
किन्नियें गै मसालें नै तूं मिगी समझाया 
बछोड़े दा नजारा 
बड़ियां शैल हियां मसालां 
पर हे छड़े शब्द 
बछोड़े दे सल्ल
बछोड़े दी पीड़
बछोड़े दी रूह् बिजन
बेजान शब्द, बस्स ।

अज्ज बड़े चिरें बाद, में फ्ही पुच्छेआ 
बछोड़ा केह् होंदा, पता ऐ तुगी? 
तूं किश निं बोल्ली, मूंह् निं सकी खोह्‌ल्ली 
कंबदे ओठ दस्सी गे 
रु’लकदे अत्थरूं आखी गे-- 
बछोड़ा केह् होंदा-- अज्ज मी पता लग्गा 
बछोड़ा केह् होंदा-- बिछड़ियै पता लग्गा ।