आई गेई ब्हार बसैंत, मेरा मन नचदा ऐ
घर आई गे न कैंत्त, मेरा मन नचदा ऐ
आई गेई ब्हार बसैंत, मेरा मन नचदा ऐ।
बांदी ब्हार दिक्खियै छाई
ऐनक चिट्टी सूरज ने लाई
पीले रंगें पाई पोशाकां
रितुएं दी रानी ऐ आई
पालें दा होई गेआ ऐंत्त, मेरा मन नचदा ऐ।
घर आई गे न कैंत्त, मेरा मन नचदा ऐ।
आई गेई ब्हार बसैंत, मेरा मन नचदा ऐ।
गुत्थ नमें रुक्खें पर आए
ठंगर,पचोआड़ न हरेआए
स’रेआं कन्नै बर्हैंकड़ फुल्ली
भौरें आइयै डेरे लाए
फिरदे न होइयै फरैंत, मेरा मन नचदा ऐ
घर आई गे न कैंत्त,मेरा मन नचदा ऐ
आई गेई ब्हार बसैंत, मेरा मन नचदा ऐ।
भागें आह्ले बसैंत मनांदे
अपने-अपने भाग सरांह्दे।
नदी-सरोबरें लगदे मेले
नच्चियै भाखां गीतड़ू गांदे
नचदे दिक्खी जीऽ-जैंत,मेरा मन नचदा ऐ
घर आई गे न कैंत्त, मेरा मन नचदा ऐ।
आई गेई ब्हार बसैंत, मेरा मन नचदा ऐ ।
