पीले रंगैं भरी-भरोची ब्हार जदूं छाई ऐ
मौसम ऐ बसंत दा, बसैंत दौड़ी आई ऐ
बब्बरू ते कड़ाह् खान ञ्याणे रज्ज लाइयै
पीले रंगैं भरी-भरोची ब्हार जदूं छाई ऐ
मौसम ऐ बसैंत दा, बसैंत दौड़ी आई ऐ।
अंबरै दा छत्त बी बद्दल समेटदे
कालियां एह् चादरां गासा दा लपेटदे
सूरज दियां किरणां धरती पौन समाइयै
मौसम ऐ बसैंत दा, बसैंत दौड़ी आई ऐ।
उप्परै दा त्रिप्प-त्रिप्प त्रेलां जेल्लै पौंदियां
पौंगरां न औंदियां, गंदलां मठोंदिया
स’रेआं दे फुल्ल झुल्लन सुन्हाकड़े मुस्कराइयै
मौसम ऐ बसैंत दा, बसैंत दौड़ी आई ऐ।
तम्हूड़ियां बी हिरख करी घर न बसांदियां
माऊ ते नानी दा बथ्हेरा चेता करांदियां
प्यार कन्नै रौंह्दियां न बस्तियां बसाइयै
मौसम ऐ बसैंत दा, बसैंत दौड़ी आई ऐ।
चीड़ें ते देआरें दी रौंसली ब्हार ऐ
पीले-पीले फुल्लें कन्नै अत्त एह् गोहाड़ ऐ
हिरखें भरी रौंस इ’नें जदूं बी लाई ऐ
मौसम ऐ बसैंत दा, बसैंत दौड़ी आई ऐ।
डोडियां न लग्गा दियां ट्येऊएं उप्पर फब्बा दियां
रौंसलियां ब्हारां कन्नै धारां न सज्जां दियां
गुत्थ ते बूर औन जेल्लै मुस्कराइयै
मौसम ऐ बसैंत दा, बसैंत दौड़ी आई ऐ।
सूरजमुखी फुल्ल दिन बडलै चढ़ांदे न
गुट्टै दी ऐ टोर बक्ख, गलें एह् मलांदे न
क्रौंगलें दे फुल्ल उप्पर, थल्लै फली छाई ऐ
मौसम ऐ बसैंत दा, बसैंत दौड़ी आई ऐ।
लीचियैं, लुगाठैं बूर खिड़ी-खिड़ी पौन
कनकें दे सिट्टे दंद हस्सी-हस्सी औन
सौंफ ते जबैन छोड़न ढिड्ड पीड़ चुकाइयै
मौसम ऐ बसैंत दा, बसैंत दौड़ी आई ऐ।
ग’रनें बी औन जेल्लै अपनी जुआनियां
गुत्थ बी नखार कड्ढी औंदियां खुमानियां
साढ़े हिस्सै बैर गै, म्हेशा गै मठेआई ऐ
मौसम ऐ बसैंत दा, बसैंत दौड़ी आई ऐ।
मुहां उप्पर पीलिया ऐ ते बेरोजगारी ऐ
अग्गी इच डोब्बी-डोब्बी पान सुद्धी चाढ़ी ऐ
गिरबी ऐ जान साढ़ी, ज़िंदगी पराई ऐ
मौसम ऐ बसैंत दा, बसैंत दौड़ी आई ऐ।
बिच्चू, गनांह् ते सप्प मुंडियां न चुक्का दे
जैह्र किट्ठा करियै डंगें लेई न टुक्का दे
धरती उप्पर होआ दी इं’दी गै चढ़ाई ऐ
मौसम ऐ बसैंत दा, बसैंत दौड़ी आई ऐ।
सोआगत ऐ बसैंत दा, सारें गी बधाई ऐ
‘कुंडरिया’ जि’न्नै रूहें च पौंगर पोआई ऐ
चलो चलचै पीलिये दा लाज हुन करोआइयै
मौसम ऐ बसैंत दा, बसैंत दौड़ी आई ऐ।
