अज्जै दा लोकतंत्र—
लोकराज बिच माह्नू फाह् लग्गा लक्का ऐ
लुंड-बदमाश जित्थै पैंच चोर चक्का ऐ ।
पुलिस कचैह्री ते कनून छड़ा धोखा ऐ
सच्चा ते गरीब कमजोर इत्थै औखा ऐ
तंग होई शराफत दी छोड़ै जदूं बत्त
आखन अदूं सारे की कनून लेआ हत्थ
दब्बे दा बदमाशी पर बदमाशें नक्का ऐ
लोकराज बिच माह्नू फाह् लग्गा लक्का ऐ ।
अज्ज लोड़ पेदी ऐ मुड़ी किट्ठे होने दी
सदियें शा पिच्छै फ्ही समूहें च रौह्ने दी
कनून कदें बिच्चा दा जे टिंड-फूढ़ी चुक्की लै
अपने बचाऽ दा माह्नू रस्ता आपूं तुप्पी लै
खुश ऐ बदमाश, खज्जल होऐ दा सच्चा ऐ
लोकराज बिच माह्नू फाह् लग्गा लक्का ऐ।
पुलस नांऽ दी चीज कदें बिच्चा जे उड्डी जाऽ
ग’ली- म्हल्लै लोकें बिच मुड़ी एका भुग्गी जाऽ
कनून-व्यवस्था ने लोकें गी बक्ख कीता दा
कैह्र तां गै थां-थां लोकें पर बीता दा
गरीब कमजोर होई गेदा निहत्था ऐ
लोकराज बिच माह्नू फाह् लग्गा लक्का ऐ ।
पुलसै दा डेरा जे इत्थूं दा चकोई जाऽ
सारी फ्ही लुकाई मुड़ी की निं इक होई जाऽ
ग’ली- म्हल्ला बनी जाह्ग जदूं फ्ही मित्तर
फट्ट बदमाश इत्थुआं होई जाह्ग तित्तर
लाज बदमाशी दा होना अदूं पक्का ऐ
लोकराज बिच माह्नू फाह् लग्गा लक्का ऐ ।
बदमाशें दी समाजै बिच किन्नी क अबादी ऐ
जे किट्ठे होन लोक करनी उ'नें केह् खराबी ऐ
किट्ठे होई रौह्ने दा जे आई जाऽ कदें चज्ज
करनी केह् पुलस ते कचैह्री जां फ्ही जज्ज
लोकें दा किट्ठे होना बदमाशें लेई धक्का ऐ
लोकराज बिच माह्नू फाह् लग्गा लक्का ऐ।
