सब किश सुनदियां घरै दियां कंधां
सब किश दिखदियां घरै दियां कंधां
चुप्पचाप दिखदे-सुनदे खड़े-खड़ोते
सब किश जानदियां घरै दियां कंधां।
मता स्हारा दिंदियां घरै दियां कंधां
सब किश समझदियां घरै दियां कंधां
कंधें दे ओह्ल्लै पर्दें च छपैली रक्खियै
केह्¬-केह् सांभियै रखदियां घरै दियां कंधां।
पक्की नींह् उप्पर खड़ोंदियां घरै दियां कंधां
मती-मती किस्में दियां घरै दियां कंधां
एह् निक्की, एह् बड्डी कंध, एह् चौड़ी एह् पतली
सब रलियै घरै गी बनांदियां घरै दियां कंधां।
कदें अत्थरुऐं च सिजदियां घरै दियां कंधां
कदे गड़ाकें कन्नै गूंजदियां घरै दियां कंधां
घरै दा दुःख-सुख अपने अंदर समेटियै
परचोलें शा बचांदियां घरै दियां कंधां।
बचपन दियां किलकारियां घरै दियां कंधां
जवानी दा खेल-तमाशा घरै दियां कंधां
जे कर समझना चाह्गेओ तां बिचारगेओ
कैह्ल्ली खामोश रौंह्दियां घरै दियां कंधां।
